طبعا انا متاكد ان مافيش حد من الظباط الملتحين حيفكر يقرا الكلام ده ولا يرد عليه...كالعاده العالم دي بتعمل اللي في دماغها و ما بتناقشش ولا بتفكر من اساسه...بس انا حاتخيل كده ان اي حد فيهم حيقرا و يحاول يناقش او يستوعب...
يالله هو التخيل بفلوس يعني
....
بقالي كام يوم بانزل وسط البلد و باعدي علي وزاره الداخليه و بيستفزني جدا منظر الاخوه الظباط المشايخ اللي معتصمين عند الوزاره... هي البلد ناقصه مشايخ يعني؟؟؟
المهم مش عارف ليه كل ما باشوفهم او بافتكرهم هم و يفطهم اللي معلقينها من نوعيه"نريد الاستشهاد و اداء واجبنا بس الداخليه مش سايبانا نربي دقننا و نحيي سنه نبينا"... يا سلام؟؟؟ ده ايه الجمال ده؟؟؟
حقيقي كل ما باشوف الكلام ده بافتكر حديث الرسول الكريم"هلك المتنطعون"
الرسول عليه الصلاه و السلام اللي لو كان شاف اللي بيتعمل باسمه دلوقتي كان ممكن يموت بحسرته...
قال علي امثالكم "هلك المتنطعون"
تعالي كده و ناقشني
اولا يا اخي يا مؤمن....الرسول عليه الصلاه و السلام اللي بتتلكك بسنته قال"المؤمن كيس فطن"... ده وصف المؤمن عند الرسول الكريم...
طب شوف انت بقي اللي بتعمله ده...هل فيه اي فطنه او كياسه؟؟؟
هل في ترك عملك في الوقت ده بالذات و البلد في امس الحاجه لكل ظابط شرطه وطني محترم بيتقي الله اي نوع من انواع الكياسه او الفطنه؟؟؟ البلد بتتحرق و انفلات امني و بلطجه و بلاوي سوده و انت مقموص و عايز تربي دقنك؟؟؟ هو انهي اولي؟؟؟ فرض العمل دلوقتي بالذات و حمايه اموال الناس و امنهم و اعراضهم ولا سنه اللحيه؟؟؟
هو مش من سنه الرسول الكريم قوله"الضرورات تبيح المحظورات"؟؟؟ طب حتي لو حلق اللحيه محظور... طب مش العمل دلوقتي في الفتره دي بالذات ضروره اولي من اي محظور؟؟؟
و مش من سنه الرسول الكريم برضه قوله"درء الضرر اولي من جلب المنفعه"؟؟؟ بتسبب ضرر قد ايه بقي انت باعتصامك ده للبلد و للناس...قدام انهي منفعه بالظبط حتنتج من انك تقر تربيه اللحيه دلوقتي بالذات...و باكرر دلوقتي بالذات؟؟؟
طب يا اخي استني لما الامور تهدي و الامن يستتب و ابقي اعتصم ساعتها و ربي لحيتك و اعمل اللي انت عاوزه...انشالله تطالب بانك تقتدي بالسنه في لبس الجلابيه و العمه... بس في وقت غير ده...
الغريب يا اخي ان تقريبا كلكم دخلتوا كليه الشرطه و اتخرجتوا في عهد حسني مبارك... و كلنا عارفين الناس كانت بتدخل الشرطه وقتها ازاي...يا بواسطه يا برشوه... طبعا كان ساعتها الضرورات تبيح المحظورات و عادي يعني...
بس يعني اللي ما سمعنا حد فيكوا طلعله حس ولا اعتصم علشان الفساد اللي كان في الشرطه ولا احتج علي السرقه و البلطجه و القتل و السحل و التنكيل بالمعارضين و البشر اللي في الشوارع...ماكانش ده ساعتها يستاهل الاحتجاج و الاعتصام بالمره... انما اللحيه هي اللي تستحق...
طب ما شفناش حد فيكوا طالب باطاله اللحيه ليه ايامها؟؟؟ ماكنتوش تعرفوا انها سنه ولا سبحان الله كلكوا التزمتوا بعد الثوره؟؟؟
مش باقلكوا متنطعون....
المهم... انا مش حاقول عليكوا جبناء و خايفين تواجهوا البلطجيه و تتعرضوا للي بيتعرضله بعض الظباط الشرفاء اللي اتصابوا او استشهدوا و هم بيادوا واجبهم في الدفاع عن البلد دي قدام البلطجيه في حاله الانفلات الامني دي و بتتلككوا باي حاجه علشان تتهربوا من الخطر ده...
و مش حاقول برضه انكوا مش عايزين تشا ركوا في سحل و ضرب المتظاهرين و السياسيين لانكوا طالما جدعان قوي كده و بتوع مواقف حتقدروا تقولوا لا زي ما غيركوا من الظباط المحترمين قالها و اتعرض للعقاب من غير تهليل و حوارات هابطه...و مش حاقول انكوا مدفوعلكوا او مسيسين من قوي سياسيه بتستخدمكوا لاغراض معينه...
بس حاقول اللي قاله رسولنا الكريم سيد الخلق علي امثالكم... يا متنطعين...
