النهارده ٢٧ نوفمبر ٢٠١٢ يوم حقيقي تاريخي....
اصنام كتير اتحطمت...و خرافات كتير كان الشعب المصري عايش على انها حقائق لا جدال فيها اتكشف زيفها
اولا خرافة ان الاخوان هم الفصيل الوحيد القادر على الحشد و تعبئة الميادين... بعيدا عن اسلوب الاخوان المعروف في الحشد...الا و هو حشر الخرفان في اوتوبيسات من الاقاليم و شحنهم زي الدواب من كل حته فيكون المنظر انهم اعداد مهولة... مع العلم ان الاعداد دي جاية من مصر كلها و ساعة ما بتكون محشودة في الميدان بتكون البلد كلها فضيت منهم.... بينما اسلوب الحشد في المعسكر الآخر هو حشد كل مجموعه في مكانها...القاهريين في القاهره و كل اولاد محافظة في محافظاتهم
بس النهارده الحشد كان غير عادي و الميدان كان مزحوم زحمه خرافية و الاعداد كانت حقيقي مهولة من غير اخوان ولا خرفان ولا اي طايفة من البهايم
ثانيا... خرافة ان ابناء القوى المدنيه في مصر ما يعرفوش يتوحدوا.... اي حد نزل الميدان النهارده و شاف منظره و شاف الليبراليين و اليساريين و الناصريين و غيرهم...كلهم بيتكلموا مع بعض و بيتناقشوا في اتجاه واحد.... حتى حزب الكنبه العقيم جاب كنبته و نزل بيها الميدان... طبعا الفلول يمتنعون...و قصدي هنا بالفلول المناظر الوسخه من امثال عكشة و سبايدر و ابو حامض و غيرهم اللي الاخوان قلبوا الدنيا على انهم المنظمين للحشد بتاع النهارده و ان الليبراليين اتحدوا معاهم ضد الاخوان... بس طبعا اي حد نزل الميدان عارف ان الكلام ده تخريف و ماحصلش و ان لو اي حد من المناظر الوسخه دي حاول يعتب الميدان كان حيتعمل فيه اللي اتعمل في يسرا و ليلى علوي و جايز اكتر شوية...
طبعا غير الاسطورة اللي الاخوان كانوا بيحلموا بيها و هي انهم حيستتب لهم حكم مصر.... دي كده في الباي باي خالص
انا سعيد جدا باللي حصل النهارده... و ربنا يكملها على خير
هو بس ابن الكلب اللي نتش الكاميرا هو اللي نكد عليا
No comments:
Post a Comment